【肌能協調篇】~ 體重管理
喺我咁多年教學裡面，見到有好多自閉症嘅學生細個嘅時候都好瘦，但係一到大概10歲左右，因為又開始發育，食量越嚟越大，但係又唔願做運動喎，咁就開始慢慢變得過重，咁樣對佢哋嘅健康真係唔好。
所以細細個就要開始培養小朋友定時做運動，就算係喺屋企，每日只係10-15分鐘都好好。 如果小朋友認知能力好啲，可以將呢樣嘢放入時間表，等佢哋自律啲去做。
我哋成人做運動嘅時候都鍾意聽住音樂，其實可以用兒歌或者輕鬆嘅音樂同小朋友一邊聽一邊做運動。
一首音樂大概2-3分鐘，每首歌就指定做一個動作，例如踏步、大字跳、仰臥起坐 (sit-up)、向前彎腰點腳、提腿、雙手舉起水樽等等。小朋友跟住拍子做，唔需要好快，但係要每日做，搵5-6首歌就可以。
有音樂就會提升佢哋嘅興趣同動力，而音樂嘅速度同節奏會令佢哋跟住一齊郁動。如果家長識用拍子機，都可以開住小朋友跟到嘅拍子開始做。
除咗幫小朋友建立做運動嘅習慣，亦都係一個好好嘅活動去提升小朋友嘅大肌同平衡感，大家不妨試吓！
以下有啲音樂家長可以參考： https://www.youtube.com/watch?v=W7IqScdAJvs
