【教學點滴】~ 第一次講有意思嘅字
- viennaha
- Mar 25, 2024
- 1 min read
Updated: Jun 17
雖然做咗特殊教育已經25年，但係每次當有小朋友由未識講嘢，到開始講有意思嘅字，都會令我好感動。
有一個兩歲半嘅小朋友，佢好少發聲，亦只對旋轉嘅嘢有興趣，俾咩佢都只係轉個物件
但係好鍾意音樂。上咗幾堂之後，佢已經建立咗基本學習態度，唔會再每次拎起一樣嘢就只有轉。
經過兩個月嘅訓練，佢發多咗唔同嘅聲音，但係都冇一個有意思嘅聲音。但係上星期，攞咗個數字板俾佢配對，佢一路指唔同嘅數字，我就一路講 果 個數字，同埋會唱數字歌俾佢聽。
突然之間，佢指住個”4“字，我講完”4“之後，佢過咗2秒自己好大聲，好清楚咁講個”4“字！
嗰刻我停咗一停，確定自己冇聽錯，跟住就好激動咁讚賞呢個小朋友。 呢個係佢第一次講有意義同埋啱嘅字，實在太開心啦！
落堂之後我即刻剪片俾家長睇，大家都非常感動！
所以各位家長一定要把握黃金期，用啱嘅方法去多方面刺激小朋友嘅腦袋。
而音樂一定係一個好嘅方法去刺激語言系統，可以試吓喺屋企多啲播啱音嘅廣東話歌俾小朋友聽。
.
.
.
Comments